Tag 1 – Tobsi:
Um 19:20 Uhr wår Abfåhrt in Richtung Salzburger Hauptbahnhof. Obwohl wir Leiter locker 10 Minuten früher då waren, san schon einige Eltern mit eahnere Kinder då g’standen. Wir håbn dånn glei ois organisatorische g’måcht, damit ma jå recht zum Zug kumman.
Bevor ma dånn oba indn Zug eingstiegn san, håts no de neichen Patrullen-Wimpeln geben. Besonderst de Kühe und Frösche haben sich mords g’freut. De Åndern sicha a, de wollten de Wimpeln oba erst in Dänemark håbn. Wahrscheinlich håbns selber dåcht, dass‘n verliern und wollten erm in Sicherheit wissen. Und dann is eh scho Richtung Norden gangen.
Tag 2 – Clara und Lena:
Jo, heid kennt ma jo eig bissi wos zum Dog und zu am krassen Ausflug in Kolding erzön. Oiso… grundsätzlich woas ned wahnsinnig spannend, oba lustig hommas echt koppt. Wir hom zerst in am Park gechillt und hom uns donn a ziemlich coole Burg angschaut. Wir hom do zwor am Onfong de Aufgobn ned wirklich verstondn oba mit da Zeit wors wirklich interessant. Am Obnd hom wir donn endlich die Eröffnungsfeier mochn kennan und es wor echt lustig! Ongfongan hom die Björns (Patrulle Bären) mit am richtig krassen Gedicht, wo a wer glei am Onfong rückwärts von da Bühne owaburzelt is. Danach worn die Kühe, als dritter die Frösche und dannoch de Wadler (Patrullen Wölfe und Adler). A echt coole Show hom donn die Leiter aufgführt. I glaub des woa a Stück von Göthe oda so (Es war Shakespeares Hamlet). In dem san zwor am Ende olle gstorben oba lustig wors trotzdem.
Tag 3 – Tobsi:
Heit is an Kasper sein Geburtstag und der wird freilich g’feiert. In da Früh håbn wir erm ålle gratuliert und z’Mittåg is dånn an Kasper sei Familie kumman. De wollten eigentlich an tradionell dänischen Kuchen mitbringen, oba der is eana eingången. Schåd, weil bei de Kuchn is a so, dass de halt ausschauen wia as Geburtstågskind und des muss si dånn quasi selber de „Gurgl durchschneidn“, während de åndern hysterisch rumschreien. I glaub i wü ned wissen, wie vü Kinder då schon traumatisiert wordn san.
So „nebenbei“ håbn da Maxi und i dånn no de Sitzbank fertig baut. Da Thomas hat a fleißig mitgeholfen, indem er beim Dåchdeckn sei inneres Kletteraffal rauslåssn hat kinna.
Tag 4 – Clara und Lena:
Heid woama im Kletterpark in Kolding. Der Weg do aufi woa gfühlte 3 Stundnd long und eigentlich hom wir während’m wandern eh scho kann Bock mehr auf Klettern koppt, weil da Weg hin uns scho anstrengend genug woa. Im Endeffekt woas donn eh lustig, oba dass wir beim Weg rauf zum Park mehr klettert san ois donn drinnen is scho a bissi sad. Nach dem tollen Wandertag hobn de Jungs uns Burger zum Obndessn kocht. Warum do des Ketchup oba noch Rotwein gschmeckt hod wiss ma selber ned. (Wir Leiter auch nicht 😐) Jetzt geht’s ab ins Bett, wir san eh scho alle todmüde.
